വേനല്ക്കാലം വന്നെത്തിയാല് കാലാവസ്ഥയിലെ മാറ്റം കൊണ്ട് തന്നെ ഇതിന്റെ വരവ് നമ്മള് അറിയും. എന്നാല് ബ്രിട്ടനില് ഇതോടൊപ്പം മറ്റൊരു കര്മ്മം കൂടി നമ്മള് ചെയ്യേണ്ടതുണ്ട്. തണുപ്പ് കാലത്തിന് മുന്പായി പിന്നോട്ട് തിരിച്ചുവെച്ച ക്ലോക്കുകള് ഒരു മണിക്കൂര് മുന്നോട്ട് നീക്കുകയാണ് ആ കര്മ്മം!
വര്ഷത്തില് രണ്ട് തവണയാണ് യുകെയിലെ ക്ലോക്കുകള്ക്ക് ഈ സമയമാറ്റം വരുത്തുന്നത്. 2022ല് ക്ലോക്കുകള് ഒരു മണിക്കൂര് മുന്നോട്ട് പോകുന്നത് മാര്ച്ച് 27, ഞായറാഴ്ച പുലര്ച്ചെ 1 മണി മുതലാണ്. ഇതോടെ ബ്രിട്ടീഷ് സമ്മര് ടൈമിന് ഔദ്യോഗികമായി തുടക്കം കുറിയ്ക്കും.
ഇതിന് ശേഷം ഒക്ടോബര് 30ന് പുലര്ച്ചെ 2 മണിക്കാണ് യുകെ ഗ്രീന്വിച്ച് മീന് ടൈമിലേക്ക് മാറുക. രാജ്യം മുഴുവന് സുഖകരമായ ചൂട് പടരുന്നതിനൊപ്പമാണ് ബ്രിട്ടന് ഔദ്യോഗികമായി വേനല്ക്കാലത്തെ സ്വാഗതം ചെയ്യുന്നത്. എന്നാല് അടുത്ത ആഴ്ച പകുതിയോടെ തണുപ്പ് വീശുമെന്നും മുന്നറിയിപ്പുണ്ട്.
സൂര്യവെളിച്ചം തേടിയെത്തിയതോടെ ഈ വര്ഷം ഇതുവരെ രേഖപ്പെടുത്തിയ ഉയര്ന്ന താപനിലയായ 21 സെല്ഷ്യസാണ് രേഖപ്പെടുത്തിയത്. തിങ്കളാഴ്ച വരെ ഈ കാലാവസ്ഥ തുടരുമെന്നാണ് കരുതുന്നത്. എന്നാല് ചൊവ്വാഴ്ച മുതല് കാറ്റ് വീശുന്നത് മാറുന്നതോടെ തണുപ്പ് തേടിയെത്തും.
ഇതോടെ പകല് സമയത്ത് താപനില 12 സെല്ഷ്യസ് മുതല് 13 സെല്ഷ്യസ് വരെയാകും. ഇംഗ്ലണ്ടിലെ സൗത്ത് മേഖലകളിലും, വെയില്സിലുമാണ് ഈ സ്ഥിതി. നോര്ത്ത് മേഖലകളില് 7 സെല്ഷ്യസ് മുതല് 10 സെല്ഷ്യസ് വരെയുമാകും താപനില. രാത്രികാലങ്ങളില് തണുത്തുറഞ്ഞ് -3 സെല്ഷ്യസ് വരെയാകാനും സാധ്യതയുള്ളതായാണ് റിപ്പോര്ട്ട്.